1 Kronieken 09
01Op dij menaaier werden aal Isrelieten in t stamregister opschreven, dat in t bouk van de keunenks van Israël opnomen is.
Jeuden wazzen noar Babel tou votvoerd, omdat ze ontraauw west haren aan God.
02De oorspronkelke inwoners kwammen weerom noar heur aigen bezittens in heur aigen steden: de gewone Isrelieten en de priesters, Levieten en tempelknechten.
03In Jeruzalem gingen gounent oet de stammen van Juda, Benjamin, Efraïm en Manasse wonen:
04Utai oet de femilie van Juda zien zeun Peres; zien veurolders wazzen in opgoande lien Ammihud, Omri, Imri en Bani.
05Van de Silonieten: Asaja, d oldste, en zien zeuns.
06Oet de femilie van Zerach: Jeüel. Aal dij femilies wazzen mitnkander zeshonderdnegenteg man.
07Oet de stam van Benjamin: Sallu, dij n zeun van Mesullam was, n zeun van Hodawja en dij weer van Hassenua;
08Jibneja, n zeun van Jerocham; Ela, n zeun van Uzzi, dij weer ain van Michri was; en Mesullam dij n zeun van Sefatja was, dij weer ain van Reüel was en dij weer van Jibnia.
09Aal mitnkander wazzen der negenhonderdzesenfiefteg noazoaten van Benjamin. Dat wazzen aalmoal femilie-oldsten.
10 Wieder woonden doar de priesters Jedaja, Jojarib, Jachin,
11 en Azarja, de hoogste in t hoes van God, dij via Chilkia, Mesullam, Sadok en Merajot in rechte lien van Achitub ofstamde,
12 en Adaja dij ain van Jerocham was, en dij van Paschur en dij weer van Malkia, en wieder nog Masai, dij via Adiël, Jachzera, Mesullam en Mesillemit in rechte lien van Immer ofstamde.
13 Dat wazzen aalmoal de oldsten van de priesterfemilies van mitnkander zeuventienhonderdsesteg man, lu van aanzain dij haildaal bie de eredainsten in tempel van God betrokken wazzen.
14 Wieder woonden doar de Levieten: Semaja, dij in rechte lien via Chassub, Azrikam en Chasabja van Merari ofstamde;
15 en Bakbakkar, Cheres, Galal en Mattanja, dij n zeun van Micha was, n zeun van Zichri, dij weer ain van Asaf was;
16 en wieder Obadja dij n zeun van Semaja was, ain van Galal en dij weer van Jedutun; en Berechja, dij n zeun van Asa was, ain van Elkana dij in n dörp bie Netofa woonde.
17 Wieder woonden doar de poortwachters: Sallum, Akkub, Talmon en Achiman, woar Sallum de hoogste van was.
18 Zien noazoaten holden tot vandoag aan tou de wacht bie de poort aan de oostzied, de Keunenkspoort. Zai haren aaltied al poortwachters bie t kaamp van de Levieten west.
19 Sallum, n zeun van Kore, dij ain van Ebjasaf was, en dij weer ain van Korach, was mit zien femilie touzichtholder bie de ingang van de tènt, net zo as heur veurolders eertieds al touzicht huilen bie de ingang noar t kaamp van de HEER.
20 Pinechas, Eleazar zien zeun, haar doudestieds laaiden over heur had en de HEER haar hom dou biestoan.
21 Zecharja, Meselemja zien zeun, ston op wacht bie de ingang van de soamenkomsttènt.
22 Mitnkander wazzen der twijhonderdtwaalf man dij oetkozen wazzen as poort- en drumpelwachters. Heur noamen stonden optaikend in de registers van heur dörpen. Heur veurolders wazzen in heur amt al aansteld deur David en Samuël, de profeet.
23 Zai en heur noazoaten mozzen touzicht holden op de ingangen van tènt van de HEER en poorten van tempel volgens n vaast wachtreuster.
24 Poortwachters stonden aan vaaier kanten op wacht: aan de oostkaant en westkaant, en aan noordkaant en zuudkaant.
25 Heur femilie oet de dörpen rondomheer kwam aalgedureg n week over om mit heur wacht te lopen.
26 Want dij vaaier vernoamste poortwachters, aal vaaier Levieten ja, haren amtshaalve ook touzicht op de vertrekken en de veurroadkoamers van t hoes van God.
27 Zai slaipen ook stoef bie t hoes van God. Dag en naacht mozzen zai ja touzicht holden en ale mörgens poorten opendoun.
28 Gounent van heur mozzen zörgen dat ales wat bie dainst neudeg was, bie t hèn- en weerombrengen teld wer.
29 Aandern wazzen weer aansteld om te zörgen veur ale aander haailege schoalen en schuddels, en veur t beste meel, de wien, de eulie, wierook en kruden.
30 Zaalfmengen mit lekker roekende kruden mog allenneg deur gounent van priesters doan worden.
31 Mattitja, n Leviet, en de oldste zeun van Sallum oet Korach zien femilie, was aansteld veur touzicht op bakkerij.
32 Aander Levieten, oet Kehat zien femilie, mozzen ale sabbatdoagen zörgen veur de teunbroden.
33 De zangers, Levitische femilie-oldsten, wazzen vrij van aander tempeldainst; dij mozzen ja al dag en naacht veur de eredainst kloarstoan.
34 Dit wazzen femilie-oldsten bie de Levieten, ook in heur ofstammen. Zai woonden in Jeruzalem.
|
